தோட்டத்தொழிலாளர்களும் கங்காணிகளும் அயர்ந்து உறங்கும் பின்னிரவில் அந்த ஜோடி, குழந்தைகளின் வாய்களில் துணி திணித்து கட்டி (பயந்து ஓசை எழுப்பினால் கதை முடிந்தது!), அவர்களுக்காக காத்திருந்த கள்ளத்தோணியை நோக்கி ஓசையின்றி நகர, இயற்கை உபாதையின் உந்துதலால் கண்விழித்த வயதான கங்காணியின் கண்ணில் பட, வெடித்தது துப்பாக்கி. அவர் காலில் குண்டு பாய, மயங்கி விழுந்தவர் மீண்டும் கண்விழித்தபோது கால் கட்டுடன் சிறையில் இருந்தாராம். குழந்தைகளுடன் தப்பியோடிய அவரது மனைவி பித்துப்பிடித்துப்போய் அவரைக்காணாமலே மரித்தாளாம்.
மரிப்பதற்கு முன் அவளது குழந்தைகளிடம் அவர்களின் தகப்பன் கருநீல வால் பொன்கழுத்து பறவையை கண்டதால்தான் இப்படி ஆயிற்று என்றும், அன்று முதல் அவர்கள் அந்தப்பறவையை பார்ப்பதையே தவிர்க்கவேண்டுமென்றும் சத்தியம் வாங்கிக்கொண்ட பின்பு இறந்துபோனாளாம்.
அவன் தீவிர சிந்தனையில் ஆழ்ந்தான்; 'ஏன் இந்தப்பறவை தொடர்ச்சியாக தலைமுறை தலைமுறையாக, தொலைதூர பூமியில் வாழும் எங்கள் பார்வையில் பட்டுக்கொண்டேயிருக்கிறது? அது என்னதான் சொல்ல முயல்கிறது?'
அடுத்த சில நாட்களில் இந்த நிலத்தில் வாழும் தன் இன மக்களில் மிக மிக வயதானவர்களை ஒவ்வொருவராக தேடிச்சென்று இதுபற்றி உரையாடவும் கேட்கவும் தொடங்கினான். ஆனால் அவர்கள் யாரும் அந்தப்பறவையை கண்டதில்லை என்பதையும், அவர்களது முன்னோர்கள் எவரும்கூட கண்டதில்லை என அறிந்தான்.
அவன் மீண்டும் தீவிர சிந்தனையில் ஆழ்ந்தான்; 'ஏன் இந்தப்பறவை தொடர்ச்சியாக தலைமுறை தலைமுறையாக, தொலைதூர பூமியில் வாழும் எங்கள் பார்வையில் மட்டும் பட்டுக்கொண்டேயிருக்கிறது? அது என்னதான் சொல்ல முயல்கிறது?'
அலுவலகத்தில் ஒரு தேநீர் இடைவேளையில் ஆப்பிரிக்காவின் காங்கோ நாட்டை தாயகமாக கொண்ட உங்க்குலு என்கிற தோழனிடம் தான் அதுவரை சேகரித்திருந்த தகவல்களை எல்லாம் பகிர்ந்தான்.
கதையை கேட்க கேட்க உங்க்குலுவின் கண்கள் விரிந்தன. அக்கண்களில் நீர்ப்படலம் திரையிடத்தொடங்கியது. அந்தத்திரையில் வேறொரு கதையின் நினைவுகள் விரைந்தன, கண்ணீராய் மண் தொட்டன.
கதையை கேட்டுக்கொண்டிருந்த உங்க்குலு ஒரு கட்டத்திற்கு மேல் தாங்க முடியாத துயரத்துடன் குமுறிக்குமுறி அழத்தொடங்கினான். அது கதை சொல்லிக்கொண்டிருந்தவனை வெகுவாக பாதிக்கவே அவன் கதை சொல்வதை நிறுத்தினான்.
உங்க்குலுவின் உதடுகள் ஒரு பெயரை மட்டும் நிறுத்தாது உச்சரித்துக்கொண்டிருந்தது;
'லியோபோல்ட்!'
'லியோபோல்ட்!'
'லியோபோல்ட்!'
தொடரும்.
லியோபோல்ட் என்றால் என்ன?? ஆர்வமாக காத்திருக்கிறேன்😀
பதிலளிநீக்கு