சிறுக கட்டி பெருக வாழ்!
கேள்விப்பட்டிருக்கிறோம்.
படித்திருக்கிறோம்.
சிறிதாய் தொடங்கி ஆல் போல் வளர்ந்து என வணிகம் பேசியிருக்கிறோம்.
அளவாய் வீடு கட்டி சுற்றம் சூழ்ந்து பெருக மகிழ்வாய் வாழ்தல் என முயற்சிக்கிறோம்.
இவையெல்லாவற்றையும் தாண்டிய புரிதல் ஒன்று வேண்டும்.
சிறுக கட்டி - சிறு வீடு கட்டி, பெருக - பல்லுயிர் பெருக, நாமும் வாழ்வோம் என்பதாகவும் இதன் பொருள் இருக்கலாம்.
பாரதி கனவு கண்ட காணி நில வாழ்வும் இதுவே, பில் மோலிசன் கற்றுத்தந்த பெர்மாகல்ச்சரும் (ஒருங்கிணைந்த பண்ணையம்) இதுவே, காந்தி மற்றும் புகுவோகா பரப்பிய சுயசார்பு பண்ணை வாழ்வும் இதுவே!
பெரிதாய் கட்டி சிறிதாய் வாழ்ந்துவிட்டுப்போகும் நமக்காகவே சொல்லப்பட்டது, அன்றே!
உணவு வீணாவதைப்பற்றி ஐ.நாவில் கூட்டம் கூட்டமாய் விவாதித்து புள்ளி விபரங்கள், அறிக்கைகள் பதிப்பிக்கிறார்கள். இந்தியாவில் 40 சதம் வீணாகிறதாம். நம் வாழ்வியல் அறியாது எழுதித்தள்ளுகிறார்கள். உணவு மீந்தால் / ஒரு இலை வீட்டிலிருந்து வெளியே விழுந்தால்கூட ஒரு கூட்டமே (மனிதர் முதல் பூச்சி வரை) அதிலிருந்து உண்ணும் இங்கு! இதில் வீணாவதெங்கு?!
அமெரிக்க ஐரோப்பிய நாடுகளில் அன்றாடம் தயாரிக்கப்படும் ரொட்டி முதலான உணவு வகைகள் அன்று மாலைக்குள் விற்பனையாகவில்லை என்றால் நேராக landfill எனப்படும் குப்பைக்குழிகளுக்கு செல்லுமே தவிர நம்ம ஊர் போல எந்த கூட்டத்துக்கும் உணவாகாது.
வருந்தத்தக்க இன்றைய வாழ்வியலில் நாமும் அவர்களைப்போல மீந்ததை அனுப்பத்தொடங்கிவிட்டோம் குப்பைக்குழிகளுக்கு, தீ வைத்து கொளுத்தப்படும் குப்பைக்குழிகளுக்கு. அந்தக்குழிகளில் இந்த உணவை உண்ண வந்து பொசுங்கிப்போகும் பல்லுயிர் அறியுமா (முதுமொழி மறந்து) தடம் மாறிப்போன நம் வாழ்வியலை?
நீங்கள் உங்கள் வீட்டிலிருந்து தனியாய் pack செய்து துப்புரவு தொழிலாளர்களிடம் தரும்/ குப்பைத்தொட்டிகளில் ப்ளாஸ்டிக் பைகளில் கட்டி வீசும் Wet waste - பல உயிர்களுக்கான உணவுதானே?!
'பெருக' வாழத்தொடங்குவோம், நமக்கு எஞ்சியதை பகிர்வோம்; அது காலையில் மிஞ்சிய இட்லியாக இருந்தாலும் ட்ராஃபிக் சிக்னலில் பிச்சையெடுக்கும் ஒரு பசித்த வயிறை நிறைக்கலாம்...
முயற்சியுடையார் பெருகவாழ்வார் :-)
Yes sir very true 👍
பதிலளிநீக்கு