இந்த நாள்!

 

நேற்றைய நாள் என் நெடுநாள் நண்பர்களான தாவரங்களோடு இனிதாக கரைந்தது. நாளை புத்தாண்டு தினம் என்பதை அவர்களுடன் பகிர்ந்தேன். புத்தாண்டு வாழ்த்துகளையும் சொன்னேன். என்னைச்சூழ்ந்த தாவரங்கள் அனைத்தும் என்னை அமைதியாக பார்த்துக்கொண்டிருந்தன. பின்னர் அவர்களுள் மிக வயதான மரம் ஒன்று என்னிடம் மெல்லிய குரலில் உரையாடத்தொடங்கியது. அந்த உரையாடலின் முடிவில், 'ஒரு வித்தியாசமான புத்தாண்டு வாழ்த்து ஒன்று எழுத விரும்புகிறேன் நண்பர்களுக்காக. மிக சுருக்கமாக ஒரு விதை (idea) தாயேன்' என்றேன். 

"தருவேன். ஆனால் நீ அதை அப்படியே பகிர்வாயா என தெரியவில்லையே..." என்றது.

'ஏன் இப்படி சொல்கிறாய்?' என்றேன்.

"உங்கள் வாழ்வியல் வழக்கம் இந்த ஒரு நாளில் அனைவருக்கும் இன்பமும் மகிழ்ச்சியும் நிறைந்த வருடமாக இருக்கட்டும் என வாழ்த்து அனுப்பி, பின் வருடம் முழுதும் அதை மறந்துவிட்டு, ஒவ்வொருவரும் தமக்கு மட்டுமே இன்பமும் மகிழ்வும் தேடி ஓடுவது, அது அடுத்தவர்களுக்கு துன்பம் தந்தாலும்; உங்களது சக மனிதர்களை பற்றிய ஆழ்ந்த அக்கறை அந்த ஒரு நாள் மட்டும்தானே".

ஓ, இந்த உரையாடல் தளம் மாறுகிறதே என்று உணரத்தொடங்கினேன். சற்று நேரம் அமைதியாக சிந்தித்தேன். பின்னர்,  'உறுதியாய், மாற்றங்களின்றி அனுப்புவேன்' என வாக்களித்தேன். இதோ, நான் பெற்ற வாழ்த்தை ஒரு வரி கூட மாற்றாமல் உங்களுடன் பகிர்கிறேன். 

அந்த புத்தாண்டு வாழ்த்து:

"இன்று ஒரு நாளாவது ஆயுதங்களை சற்றே ஓய்வெடுக்கவிட்டு இளைப்பாறுவோம். இன்று புதிய வருடம் பிறந்திருக்கிறது. பிறந்த குழந்தைக்கு நாம் யார் என உணர்த்த நமக்கு நிறைய நேரமிருக்கிறது.

நாம் இளைப்பாறும் இந்த நாளில் மட்டுமாவது அவர்கள் நிம்மதியாக சுவாசிக்கட்டுமே. பாவம், எத்தனை காலம்தான் அவர்கள் போராடிக்கொண்டே இருப்பார்கள் இந்த நிம்மதிக்காக...

இறையே, இந்த ஆண்டாவது, யார் வாழ்வது யார் வீழ்வது என்பதை யார் யாரோ முடிவுசெய்யாமல் இருக்க மனது வையேன்...

அது என்னவோ தெரியவில்லை, நம்மால் வெட்டப்படும் ஒவ்வொரு இழையும் மீண்டும் துளிர்க்கவே விரும்புகிறது. அது மனிதராக இருக்கலாம், மரங்களாக இருக்கலாம், பறவைகள், விலங்குகள், பூச்சிகளாக இருக்கலாம், மலைகளாகவோ நதிகளாகவோ கடல்களாகவோகூட இருக்கலாம். ஏன், காற்றாகவோ நிலமாகவோ கூட இருக்கலாம். இவர்கள் எல்லோருக்குமானதுதானே நமது பூமி!

இந்த ஆண்டின் இந்த நாள் தொடங்கி இனி வரும் ஒவ்வொரு நாளுமே 'நலம் மீட்கும் நாளாக' மட்டுமே இருக்க (Day of Healing) வாழ்த்தி, அதை நனவாக்கவும் நாம் அனைவரும் சற்றே உழைப்போமே"

பேரன்புடன்,

பாபுஜி