பட்டுப்புடவைக்கு எத்தனை கால்?!

கழுதை மிட்டாய் பதிவில் பாம்புபோல் தோல் உறித்துக்கொள்ளும் கழுதையை கற்பனையாய் எழுதியிருந்தேன்.

அது நனவாகும் நாள் தொலைவில் இல்லை போலிருக்கிறது!

பட்டுப்புழு, காலங்காலமாய் பட்டு நூலிழை செய்துகொண்டிருக்கிறது.

எட்டுக்கால் பூச்சி காலங்காலமாய் வலைப்பொறி பின்னி வயிறு வளர்க்கிறது.

'எல்லாம் ஒழுங்காத்தான போய்க்கிட்டிருக்கு' என்றுதான் இருந்தேன், பதினைந்து ஆண்டுகளுக்கு முன்னால் அந்த அறிவியல் அறிக்கை வரும்வரை...

'எட்டுக்கால் பூச்சியின் எச்சில் இழை எஃகை விட உறுதியானது, ரப்பரை விட அதிக  'சுருங்கி விரியும்' தன்மை (elasticity) கொண்டது. அதாவது அந்த இழையளவு தடிமனுள்ள எஃகு/ரப்பர் இழையுடன் ஒப்புநோக்கும்போது)'.

அடுத்த நாட்களில் நான் நண்பர்களிடம் வேடிக்கையாய் 'அடுத்த பெரிய factory இந்த yarn பண்ணத்தான். என்ன...சங்கு ஊதி factory gate திறந்ததும் வரிசையா spidersதான் வெளில போகும், நொந்து நூலாய்ப்போய் :-)' என்று சொன்னதும், இதையே கார்ட்டூனாய் வரைய முயன்றதும் இன்றும் நினைவில் உள்ளது.

சரி, நிகழ்காலத்திற்கு வருவோம். இந்த செய்தியை அறிவியல் என்ன செய்ததென்று அறியும் ஆவலில் நிகர் உலக வலையை வீசினால் சிக்கியதென்னவோ பட்டுப்புழுக்கள், புற ஊதா வெளிச்சத்தில் ஒளிரும் கால்களுடன்!

உலகெங்கிலுமுள்ள அ(ழி)றிவியலாளர்கள் பல்வேறு சோதனைகள் செய்து பார்த்து இப்போது 'வெற்றியிழையை' எட்டிப்பறிக்கும் தூரத்துக்கு வந்துவிட்டனர், அப்பாவிப்பட்டுப்புழு துணையுடன்...

ஆரம்பத்தில் ஆய்வுச்சாலையில் கூட்டமாய் 8கால் பூச்சி வளர்த்து இழை எடுக்க முயன்றால், 'எனக்கு கூட்டம்னாலே பிடிக்காது. அதனால மிச்ச எல்ல்லாரையும் சாப்ப்ட்டேன்' என ஒற்றை 8கால் பூச்சி மட்டுமே ஏப்பம் விட்டபடி இழை பின்னியதாம்.

'8காலனின் மரபணுவை புடிக்குறோம், கத்திரிக்கோல்ல லைட்டா நறுக்குறோம். சமத்தா வேலை செய்ற அப்ரெண்டிசை புடிக்குறோம், ஒட்றோம், இழை பிண்றோம், பிண்றோம், பணம் பண்றோம்' என மிஷன் மோடில் கையில் கத்தரிக்கோலுடன் திரிந்தவர்களின் கையில் வசமாய் சிக்கியது பட்டுப்புழு...

சில பல ஆபரேஷன்களுக்குப்பிறகு இன்று உலகின் சில பகுதிகளில் வணிக நிறுவனங்களின் லேப்களில் இந்த அப்பிராணிகள் Spider Silk ஐ உமிழ்ந்துகொண்டிருக்கின்றன, நீல நிற ஒளி உமிழும் கால்களுடன் (ஆபரேஷன்னா...சைடு effect லாம் சகஜமப்பா!). போர் என்ற பெரு வணிகச சந்தையில் இந்த இழையின் பயன்பாடுகள் ஏராளம், எளிமையாய் மலிவாய்...உயிர் காக்கும் ஆடைகளில் இருந்து உயிர் எடுக்கும் ஆயுதங்கள் வரை...

'ஆபரேஷன் சக்சஸ்!' என சந்தைப்படுத்தலை நோக்கிய ஓட்டத்தில் முன்னிலை வகிக்கும் ஒரு சிறு நிறுவனத்திடம் அமெரிக்க இராணுவம் 100 மில்லியன் டாலர்களுக்கு purchase agreement செய்துள்ளதாம்.

பட்டுப்புழுவெல்லாம் எப்போதும் போல மல்பெரி இழைகளை தின்று ஆனால் Spider Silk உமிழ ஆரம்பித்தால், பட்டுப்புடவைக்கு என்ன ஆகும் என்பதை தாண்டி உயிர்ச்சூழல் பாதிப்புகள், உணவுச்சங்கிலி பாதிப்புகள் பற்றி யாராவது கவலைப்படுவாங்களா என்ன பாஸ்!

ஒரு நாள் வரும், ஒளி உமிழும் கால்களுடன் பறந்துவரும் கொசுக்கூட்டம் ஒன்று நம்மை கடிக்கும். அதன்பின்னால் நாமும் எச்சில் வழியே இழை உமிழத்தொடங்குவோம். அதற்கு என்ன பெயர் வைப்பதென்று அப்போதும் பட்டிமன்றம் நடத்துவோம், நாம யாரு!!!!