உச்ச கர்ம யோகா!

ஜெய்கணேஷ்

நாசர்

ராமராஜன்

முரளி

பாண்டியன்

பாக்யராஜ்

பாண்டியராஜன்

மோகன்

பாரதிராஜா(!)

ராஜசேகர்

சந்திரசேகர்

தேங்காய் சீனிவாசன்!

என்னதான் நாம் நம் தொழிலை நேசித்தாலும் நம் விருப்பு வெறுப்புகள் நம்மையறியாமலேயே நம் செயலில் வெளிப்படும், என்னதான் 'ஞான் ப்ரோஃபஷனலாக்கும்!' என்று காலரை தூக்கிவிட்டுக்கொண்டாலும்.

சில மனிதர்களோடு சில நிமிட உரையாடல்கூட சில நேரங்களில் "கடக்க இயலாத காலவெளி" போல மாறி நம்மை சோர்வடையச்செய்யலாம். 

வாழ்நாளின் பெரும்பகுதி, இப்படியான "உரையாடல்களுடனே" விழித்திருக்கும் நொடியெலாம் பயணிக்கும் ஒருவர் எத்தனை காலம்தான் இந்த சூழலில் செயல்பட இயலும், அதுவும் தன் க்ரியேடிவிடியை சற்றும் குறைத்துக்கொள்ளாமல்?

நம் ஊரில் ஒருவர் இருக்கிறார்!

பல மாதங்கள் பலர்கூடி தேர் இழுத்து ஒரு திரைப்படம் உருவாகிறது. 

அனுபவம் மிக்க இயக்குநர்கள், கற்றுக்குட்டி இயக்குநர்கள் என யார் இயக்கினாலும், அப்படம் ஒரு முழு வடிவம் பெறுவது இசை அதனோடு சேர்ந்தபின்புதான்.

இப்படி, இசை சேர்வதற்கு முன்னால் ஒளி வடிவில் அறைகுறையாய் நிற்கும் படத்தை, ஒவ்வொரு படத்தையும், ஒரு முறை இரு முறை அல்ல, மூன்று முறை பார்த்து அதற்கு இசை சேர்ப்பது கொடுமையான பணி.

இதைவிட கொடிய பணி, பாடல்களுக்கென அமைத்துக்கொடுத்த அற்புத இசை, படமாக்கப்படும் விதம்!

எல்லாம் ஷீட் செய்து முடித்து ரெகார்டிங் ஸ்டுடியோவில் ரீல்கள் ஓடும்போது, எப்பேர்ப்பட்ட ஞானியானாலும் "இப்படி பண்ணீட்டீங்களேடா!" என்ற கோபம் வருவதும் இயல்புதான்.

இவருக்கு இதுவும் வருவதில்லை!

அறிமுகம் இல்லாத முகங்கள், photogenic தன்மை இல்லாத முகங்களை ரசிகர்கள் மத்தியில் பதிய வைக்க, கொண்டாட வைக்க, இதுவரை தமிழ் திரையுலகம் கையாண்ட உத்திகள் இரண்டு. 

ஒன்று - ஒரு மனிதனை மக்கள் நடிகராக, ஒரு நாயகனாக ஏற்றுக்கொள்ளும் வரை, salable stars ஐ சேர்த்து நடிக்கவைத்து சில படங்கள் செய்து அதன்பின்னர் நடிகரை தனியாகவும் நடிக்கவைத்து படங்கள் தயாரித்து அங்கீகாரம் கிடைக்கவைப்பது. இது எஸ் ஏ. சந்திரசேகர் வழி. பணம் இல்லாத பலருக்கு எட்டாத வழி.

இரண்டு - எப்பேர்ப்பட்ட முகங்களையும் ஒரே பாட்டில் அனைவருக்கும் ஆதர்ச முகமாக மாற்றும் மந்திர வழி, இவரது வழி!

சிறு பொன்மணி அசையும் அசையும் என பாரதிராஜாவையும் நாயகனாக ஏற்கவைத்த மந்திரம் இவரது இசை!

இந்த பதிவின் தொடக்கத்தில் இருக்கும் பெயர்ப்பட்டியல், இவரது இசையின் விரல்பற்றி மாயக்கம்பளம் ஏறி திரைவானில் உற்சாகமாக வலம் வந்த சாமானிய, சராசரி முகங்கள்.

இந்த பட்டியலின் கடைசிப்பெயர் உங்களில் பலருக்கு வியப்பளிக்கலாம்.

தேங்காய் சீனிவாசன்.

!

அன்பே சங்கீதா என்று ஒரு படம்.

ராஜாவும் SPB யும் இணைந்து, கேட்பவரை உயரே உயரே மந்திரக்கம்பளத்தில் தூக்கிச்செல்ல, தேங்காய் சீனிவாசன் இந்தப்பாடலை பார்ப்பவர்களை கீழே கீஈஈஈழே இறக்கி... கொத்திக்குதறியிருப்பார் விரல்களால் (விழிகளாலும்தான்) பியானோவில்!

காட்சியமைப்புக்காகவும் நடிப்புக்காகவும் நான் மறக்க விரும்பும் ஒரே இளையராஜா இசைக்கோவை இந்தப்படத்தின் பாடல்கள் மட்டுமே!

(இதே படத்தில் இடம் பெறும் இன்னொரு அருமையான பாடல் "கீதா....சங்கீதா..." - 

ஐயகோ! ஜெய்கணேஷ்க்கான பாடல் இது. இதுவும் படமாக்கப்பட்டவிதம் நம்மை "வச்சி செய்யும்"! 

.

இந்தப்பாடல்களை காட்சிகளாக பார்ப்பதற்கு முன் நான் கற்பனை செந்திருந்தவை வேறு, கண்டது வேறு.

சின்னப்புறா ஒன்று என SPB தொடங்கையில் இசை அவரது குரலோடு சேர்ந்து எனக்குள் கடத்திய அதிர்வான சோகம், கீதா... சங்கீதா.....என தொடங்கி சரணம் தரும் நாஸ்டால்ஜியா....படமாக்கிய விதத்தை பார்த்தபிறகு போயே போச், போயிந்தே, கான்!)

இதைப்பார்தபின்பு ராஜா மீதான எனது மரியாதை பல மடங்கு உயர்ந்தது.

"எப்படி சார்???? இந்தப்பாட்டுக்கள் படமாக்கப்பட்ட விதத்தைப்பார்த்தபின்பும் எப்படி சார் உங்களால் காம்ப்ரமைஸ் இல்லாத பிஜிம் கொடுக்க முடிந்தது????!, இன்னும் பல முகங்களுக்கு இசைத்துக்கொண்டே இருக்கமுடிகிறது?!"

உச்ச கர்ம யோகம், இதுதான் போல...

பிறந்த நாள் வாழ்த்துக்கள் ராஜா சார்.

யாம் பெற்ற இன்பம் பெறுக இவ்வையகம்! என்னை மலைக்க வைத்த அந்த பாடல்களின் காணொளி லிங்க்:

சின்னப்புறா ஒன்று

கீதா... சங்கீதா...

(Image may be copyright protected by its owner)