மனுஷன்டா!

 

மதுக்கோப்பைகளால் கட்டப்பட்ட மாளிகை பார்த்திருக்கிறீர்களா?

உச்சியில் ஒற்றைக்கோப்பை. அதன் கீழ் சில. அதன் கீழ் பல. அதன் கீழ் பலப்பல கோப்பைகளை அடுக்கி, உச்ச கோப்பையில் பளபளவென மின்னும் மதுவை ஊற்ற, அது நிரம்பி வழிந்தபின்னும் தொடர்ந்து ஊற்ற, அடுத்தடுத்த வரிசைகளின் கோப்பைகளும் நிரம்பி வழியும்.

இந்த வரிசையை ஒரு சம தளத்தின் மீது ஆயத்தம் செய்து துளி கூட சிந்தாமல் சிதறாமல் ஆடம்பர தளத்திற்குள் தள்ளிச்சென்று, லாபத்தில் கொழுத்த பெரு வணிக கரங்கள் ஒவ்வொரு கோப்பையாக இலாவகமாக எடுத்து துளிகூட சிந்தாமல் பருகி களிக்கும் நிகழ்வுகள் நித்தம் நடக்கிறது நம் உலகில். இவை பெரும்பாலும் வணிக வெற்றியின், பெரு லாபத்தின் கொண்டாட்டமாகவே இருக்கும்.

இந்த மதுக்கோப்பை மாளிகை, சம தளத்தின் மீது இல்லாமல் இரு வேறு திசைகளில் ஒன்றின் மீது ஒன்று உரசிக்கொண்டே நகர்ந்துகொண்டிருக்கும் இரு தட்டுகளின் மீது இருந்தால்?

இமயம் நிற்பது இரு பெருந்தகடுகளின் மேலே.

இந்த பூமித்தகடுகளின் உரசலில் பிறந்த இமயம்தான் நம் உலகின் மிக இளமையான மலைத்தொடராம்.

மலைப்பனி உருகி உருகி உயிர் நனைக்கும் நீராகி ஆறாகி பள்ளத்தாக்குகள் சமவெளிகள் இறங்கி ஓடி கடல் மடி தேடி அடைவது இயல்பு.

ஓடும் நீரை பயன்படுத்தி, ஓடுகின்றபோது மட்டும் உணவுப்பயிர் வளர்த்து மகிழ்வாய் வாழ்ந்தோர் கோடி கோடி.

உணவு, உணவாக இருந்தவரை சிக்கல் எதுவுமில்லை.

உணவு, வணிகமாக மாறியபோதுதான் மாறிப்போனது எல்லாமே!

பனி உருகும் காலம் / மழைக்காலம் தவிர மற்ற காலங்களில் நாம் பயிர் வளர்க்கத்தொடங்கியது வணிகத்தின் வயிறு நிரப்ப மட்டுமே.

சந்தைப்பொருளாதாரத்தின் கட்டளைப்படி ஆசிய நாடுகளும் தீவனப்பயிர் வளர்ப்பதும் வணிகத்திற்கான மூலப்பொருள் வளர்ப்பதும் இதனால்தான்.

தமிழக தேயிலை தோட்டங்கள், மேற்குத்தொடர்ச்சி மலை காடுகளை களப்பலி தந்து அவற்றின் கல்லறைகளின் மீது எழுப்பப்பட்ட வணிக மாளிகைகளே!

காபி, மிளகு, ரப்பர், கோகோ, கரும்பு, நெல் இப்பயிர்கள் நிற்கும் நிலங்களின் கீழும் அழிந்த காடுகளின் எலும்புக்கூடுகள் மன அழுத்தம் தாளாமல் நிலக்கரியாக மாற, ஆசியாவிலேயே மிகப்பெரிய நிலக்கரி புதையல் தமிழகத்தின் அரிசிக்கிண்ணத்தின் கீழே என ஆழத்தோண்டுது ஒரு கூட்டம்.

இப்பயிரெலாம் வளர்ந்து உலக நாடுகளின் கரன்சிகளாக மாற்றம் பெறவேண்டுமானால் மழையற்ற காலங்களிலும் நீர் தேவை, எனவே ஆற்று நீரை 'அணை'த்து தடுப்போம் என அறுபது ஆண்டுகளுக்கு முன்னால் தொடங்கிய மல்யுத்தம், ஆறுகளிலிருந்து மலையேறி, மலையிடை பள்ளங்களை அணைகளாக மாற்றும் பணி கடந்த முப்பது ஆண்டுகளாக வெகுவேகமாக நடக்கிறது.

நமது தேவையை தாண்டிய ஆசைகளுக்குதான் எல்லையே கிடையாதே. எனவே தொடர்ந்து அணைகள் செய்தோம், செய்கிறோம்

நதிகளின் போக்கை மாற்றினோம், மாற்றுகிறோம். இவை பெருக்கிய விளைச்சலைக்கொண்டு மென்மேலும் வணிகம் பெருக்கினோம், பெருக்குகிறோம். வணிக ஆலைகளின் வெப்பப்பெருமூச்சு, நஞ்சு அப்பிய பெருமூச்சு, நம் வான் பரப்பை சூழ்ந்து நம்மால் கணிக்க இயலாத விதங்களில் நம் சுற்றுச்சூழலை சிதைத்தது, சிதைக்கிறது, சில தினங்கள் முன்பு திடீரென வெடித்துச்சிதறிய இமயமலைத்தொடரின் பனிக்கட்டிப்பாளங்கள், பனிக்கட்டிப்பாறைகள் இத்தகைய ஒரு நிகழ்வினால்தான்...

நூற்றுக்கணக்கானோரை காணோம் என நாம் இப்போது தேடுகிறோம். பல்லாயிரக்கணக்கானோர் காணாமல் போயிருக்கின்றனர் இதே இமயத்தொடரில் சில பத்தாண்டுகளில்...

ஆனாலும் அயராது தொலைத்துக்கொண்டே இருக்கிறோம்!

ஒன்றின் மீது ஒன்று உரசிக்கொண்டே இருக்கும் இரண்டு நகரும் தன்மையுடைய தட்டுகளின் மீது எத்தனை எத்தனை அணைகள்? எத்தனை எத்தனை உயரங்களில்?

மின்சாரம் உண்டாக்க எளிதான பாதுகாப்பான வழிகளில் நவீன அறிவியலால் இயலும்.

தண்ணீரை தேவை தாண்டிய ஆசைக்கும் நவீன அறிவியலின் உதவியோடு நம்மால் சேமிக்க இயலும், நம் காலடியின் அடியில் விரவி இருக்கும் பூமியடி நீர்த்தேக்கங்களில் (aquifers).

ஆனால் "ஏன் இப்படி செய்வதில்லை?!" என்று சிந்திக்கக்கூட நமக்குதான் நேரமில்லை...

அரிது அரிது மானிடப்பிறவி அரிது.

அதனினும் அரிது நோய் நொடியற்ற வாழ்வு.

அதனினும் அரிது தன்னிறைவான வாழ்வு.

இந்த அரிதான மானுடம் அற்புதங்கள் செய்வதும் அற்ப மானிடப்பதராய் மாள்வதும் அவரவர் விருப்பம்.

ஆனால் எந்தவொரு முன்னறிவிப்புமின்றி திடீரென கவிழ்ந்த பனிப்பாறை சேற்றுக்குழம்பில் சிக்கி மூச்சு முட்டி மரண தருணத்தில் மனைவி குழந்தை சுற்றம் நட்பை எண்ணி மருகி நம் சக மனிதர்கள் புதைந்து மாண்டது யாருடைய விருப்பம்????

நேற்று உடைந்து சிதறிய நம் அணை கூட. இந்த மதுக்கோப்பை மாளிகையை அலங்கரித்த ஒரு கோப்பைதான்...

ஏனெனில் இந்த மாளிகை நிற்பது ஓயாது உரசி எதிரெதிர் திசையில் நகரும் இரு தகடுகள் மேல்தான்.

இதற்கெல்லாம் சளைக்காத மானுடம் இன்னும் எத்தனை மதுக்கோப்பைகளை இதன்மீது அடுக்கப்போகிறதோ...

(Photos: Creative Commons)