கல்யாண வைபோகமே

 

மகாமாரி அரசாளும் காலகட்டத்தில், சிறார் திருமணங்கள் மீண்டும் பேசு பொருளாக இன்று பொதுவெளியில்.

இந்தியா, இலங்கை, வங்கதேசம், மியான்மர், ஏழ்மைப்போர்வையில் குளிரில் நடுங்கும் ஆப்பிரிக்க நிலங்கள்... இன்னும் நம் கவனத்திற்கு வராத பல ஏழ்நிலங்கள்.

அன்றாடங்காய்ச்சி வாழ்வாக இன்றுவரை உடல் உழைப்பை மட்டுமே நம்பி வாழும் இந்நில தாய்மக்கள், தகப்பன்கள், தம் பெண் குழந்தைகளை 'உணவு, உறைவிடம், பாதுகாப்பு' என்கிற மூன்று அடிப்படை காரணங்களுள் ஏதோ ஒன்றுக்காக இன்றும்கூட பதின்பருவம் தாண்டுமுன்பே திருமணம் செய்து தருகிறார்கள்.

இந்தியாவில் மட்டும் இந்த ஆண்டு 5000க்கும் மேலான சிறார் திருமணங்கள். கணக்கில் வராமல் இன்னும் சில ஆயிரங்கள் நிகழ்ந்திருக்கலாம்.

ஆதி குடிகளாய் கானகங்களில் கனிந்த நம் வாழ்வியலில் உணவு, இருப்பிடம், வாழ்நாள் வரை பாதுகாப்பு இவை மூன்றும் இயல்பாய் கிடைத்திருந்தது; ஆளுண்ணி விலங்குகள் நிறைந்த கானகங்களிலும்...

வளமான வாழ்வு தேடி விலகிப்பரவி சமுதாயங்கள் செய்து, எல்லைகள் விரித்து, நிலம், இனம், நாடு, எல்லைகள் என எல்லையற்று விரிந்து, தொழில்நுட்ப நுண்ணோக்கி மூலம் அண்ட சராசரத்தை அலசும் அளவு முன்னேறிய நம் 'உலகமயமான' வாழ்வியலில், இன்று வரை இந்த மூன்று அடிப்படை தேவைகள் ஏன் அனைவர்க்கும் சாத்தியமில்லை?

செல்வ செழிப்பின் அடையாளங்களாய் ஜொலிக்கும் "வளர்ந்த மேலை நாடுகளிலும்" சிறார் திருமணங்கள் நிகழ்கின்றன இன்றும். அவை நம் கவனத்துக்கு வருவதில்லை. அவ்வளவே.

"இந்த சிக்கலை நாம் நம் நிலப்பரப்பில் காலூன்றி நின்றுகொண்டு அலசி ஆய்வது பலன் தராது" என்ற முடிவோடு ஒரு புகைப்படக்கலைஞர், ஜானி மில்லர், ஒரு எந்திரக்கண்ணை (drone) வானுக்கு அனுப்புகிறார்.

'விலகி நின்று அணுகினால் மட்டுமே சிக்கலின் மூலமும் தீர்வும் தெளியும்' என்பதை இந்த 'உயரப்பறவை, உயரப்பார்வை' உறுதி செய்தது.

மூன்று நிலப்பரப்புகள், மூன்று Aerial shots,   (இந்தியா, மெக்சிகோ, ஆப்பிரி்க்கா), ஒற்றைப்பாடம்...

சமூக ஏற்றத்தாழ்வுகள், நம் தாழ்நிலக்கண்ணோட்டங்களில் பிடிபடுவதில்லை. சற்று உயரே சென்று கீழ்நோக்கினால் சிக்கலும், மூலமும், தீர்வும் நம் ஒற்றைப்புள்ளியில் குவியும்.

பல்லாயிர வருட வளர்ச்சியில் நாம் வகுத்த 'இருப்போர் vs இல்லாதோர்' வாழிடங்களும் வளர்ந்துகொண்டே இருக்கின்றன, தம் வண்ணம் மாறாமல்.

இவை இரண்டுக்கும் உள்ள இடைவெளி, வேற்றுமை, இட்டு நிரப்ப முடியாத ஒன்று அல்லவே?

இன்று இந்திய வானில் தாவிச்செல்லவிருக்கும் 'தகவல் தொடர்பு தானியங்கி செயற்கைக்கோள்' இந்த இடைவெளியை படம்பிடித்து காட்டட்டும், இட்டு நிரப்பட்டும்; நிலவின் கற்களை பொறுக்கி வரும் ஆவலும், செவ்வாய் கிரக உயிரிகளை இனம் காணும் அவசரமும் சற்றே பசியோடு இளைப்பாறட்டும்...

வாழ்வே தவம்.

தவமாவது அன்பு.

அன்பு அடைக்கட்டும் இந்த இடைவெளியை, ஒவ்வொரு இதயமாய் இட்டு நிரப்பி...