பாதுகாப்பில்லாத தேசம்

நம் நாட்டிலுள்ள அனைத்து அரசுகளுக்கும்,  கட்சிகளுக்கும், பெருநிறுவனங்களுக்கும் ஒரு எளிய இந்தியனின் விண்ணப்பம்:

ஊடகங்களில் காண்பிக்கப்பட்ட ஒரே காரணத்தால், குடும்பப்பொறுப்பை ஒற்றையாய் சுமக்கும் ஏழை அம்மாவுக்கு உதவியாய் சாலையில் தேநீர் விற்ற பதின்வயது சிறார்களை கவர்ந்து சென்று, காப்பகத்தில் வைத்திருந்து, தாயின் + நல்மக்களின் எதிர்ப்பு கண்டு பின்வாங்கி, மீண்டும் தாயிடம் சேர்க்கின்றது ஒரு அமைப்பு, அரசின் உதவியோடு.

'இனிமேல் குழந்தைகளை வேலைக்கு அனுப்பமாட்டேன், நன்கு வளர்ப்பேன், பள்ளிக்கு அனுப்புவேன்' என அந்த அம்மா உத்தரவாதம் தந்தபிறகு.

தேநீர் விற்ற சிறார்களுள் ஒருவர் ஆணுடை அணிந்த சிறுமி,

சீர்குலைந்த சமூக ஆண்களின் விஷமப்பார்வையிலிருந்து மானம் காக்க ஆணுடை உதவும் என்கிற நம்பிக்கை...

'நீ வேலைக்குப்போய் பசங்கள காப்பாத்தவேண்டியதுதான? ஏன் இப்படி ரோட்ல டீ விக்க வைக்கிற?' என்ற கேள்வி அம்மாவிடம் வைக்கப்படுகிறது.

'குடிகாரர்களும் காம வெறியர்களும் நிறைந்த சமுதாயத்தில் யாரை நம்பி என் குழந்தைகளை தனியே வீட்டில் விட்டுவிட்டு உழைக்கச்செல்வேன்? அது இயலாத காரியம் என்பதால்தானே அவர்களை படிக்கவைக்க முடியாமல் வீட்டிலிருந்தபடியே உழைத்து, எனக்கு வேலையில் உதவ வைக்கிறேன்! ' என்ற அவளது பதில் கேள்வி, நம் அலட்சியத்தின் பெருஞ்சக்கரங்களின் அடியே சிக்கி வழக்கம்போலவே சிதைந்துபோகிறது...

இன்னொரு நிகழ்வில், நேற்று ஒரு சிறுமியை சூறையாடி கொன்று வீசியிருக்கிறான் யாரோ ஒருவருடைய மகன் / சகோதரன் / தோழன்...

நேற்று ஒரு 24 வயது அம்மா, வேலைக்கு போனவள், ஒரு 17 வயதான, யாரோ ஒருவருடைய மகனால்/சகோதரனால்/தோழனால் சீரழிக்கப்பட்டு உயிர்பறிக்கப்படுகிறாள். அவளது கணவன் அவளைக்காணது தேடி ஒரு பெட்டிக்குள் உயிரற்று முடக்கப்பட்டவளை வீடு சுமக்கிறான்.

அவளது அழுகை கூக்குரலும் நம் அலட்சியத்தின் பெருஞ்சக்கரங்களின் அடியே சிக்கி வழக்கம்போலவே சிதைந்துபோகிறது...

கண்ணுக்குத்தெரியாத ஒரு கொலைக்கிருமியிடமிருந்து நம்மை பாதுகாக்க அரசு இயந்திரத்தின் அத்தனை சக்கரங்களும் முடுக்கிவிடப்பட்டு, நம்மை வீட்டுக்குள்ளேயே பத்திரமாய் காப்பாற்ற பாடுபடும் எந்த அரசுகளும் ஏன் இந்த விளிம்பு நிலை மனிதர்களின் உயிர்காக்க, வாழ்வு காக்க, மானம் காக்க திட்டங்கள் செயலாற்றமுடியவில்லை?

மானத்தோடு தன் குடும்ப வயிறு வளர்க்க, நம் நாட்டை பொருளாதார வல்லரசாக்க, வாயைக்கட்டி வயிற்றைக்கட்டி  உழைக்க, வெளியில் செல்லும் ஒவ்வொரு தகப்பனும், அம்மையும் இடையறாது வேண்டுவது "வல்லூறுகளின் நடுவே நம் குழந்தைகள் சிக்காது இன்றைய பொழுதும் உயிருடன், நலமுடன் இருக்கவேண்டுமே!' என்பதே!

வண்ணத்தொலைக்காட்சிகள், மிக்சிகள், க்ரைண்டர்கள், வாகனங்கள் விலையில்லாது தரும் அரசுகள் ஏன் இவர்களை சார்ந்திருக்கும் இவர்களது சிறார்களுக்கும், முதியோர்க்கும் 

சமுதாயப்பாதுகாப்பு (சமுதாயத்திலிருந்தும் பாதுகாப்பு) தர "விலையில்லா பகல்நேர பாதுகாப்பு மையங்களை" அமைத்து செயல்படுத்தக்கூடாது?

இந்த மையங்களை அரசுகளும், CSR விதிகளுக்காக லாபத்தை செலவழிகவேண்டிய கட்டாயத்திலுள்ள பெருநிறுவனங்களும் நடத்தட்டுமே?

அவ்வாறு நடத்தினால், விலையில்லா பொருட்களை அவரவர் தேவைக்கேட்ப விலை கொடுத்து அவர்களே வாங்கிக்கொள்வார்கள். அந்த செலவு அரசுகளுக்கு மிச்சம்.

கூட்டிக்கழித்துப்பார்த்தால், இப்போது அரசுகள் விலையில்லா பொருட்கள் வழங்க செலவிடும் தொகையும், பெறுநிறுவனங்கள் சமுதாய மேம்பாட்டுக்காக செலவிடும் லாபத்தின் சிறுதொகையும் இந்த பாதுகாப்பு மையங்கள் நடத்த தேவையான தொகையைவிட குறைவாக இருக்கவும் கூடும்.

ஆனால் பலன்கள் பலமடங்கு:

1. பகல் பொழுதுகளில் நலமான சூழலில், பாதுகாப்புடன் குழந்தைகள்/முதியவர்கள். 

2. அங்கு அவர்களுக்கு கல்வி தருவதும், சத்துணவு தருவதும் மருத்துவம் பார்ப்பதும் எளிது.

3. பெற்றோர்கள் நிம்மதியாய் தாம் வேலை செய்யுமிடங்களில் உற்பத்தி பெருக்குவார்கள்.

4. பாலியல் குற்றங்கள் குறையும்.

5. வயதானவர்களின் உடல்+மன நலம் மேம்படும்.

6. நாட்டின் மருத்துவத்தேவைகள் குறையும்.

7. வேலையில்லாதோர்க்கு நல்லதொரு வேலைவாய்ப்பிடங்களாக இந்த மையங்கள் வளரும்.

8. இன்னும் பல.

'பெரிதினும் பெரிது' கேட்கச்சொன்ன முண்டாசுக்காரனின் வழித்தோன்றல்கள் நாம், இந்தச்சிறிய "அக்கினிக்குஞ்சு" எண்ணத்தை நம்மிடையே நாமே விதைப்போமே... 

இதன் தழல்வீரம், காடெறிக்காது, மாறாக, தீண்டிய இடமெல்லாம் நாடு வளர்க்கும், மனிதம் தழைக்கும்.

பள்ளிக்கூடங்கள் தந்த கடமை வீரர், சத்துணவு தந்த மக்கள்திலகம், ஏழைகளின் வாழ்வை மேம்படுத்த போராடிய திராவிட கட்சிகள், கம்யூனிச சித்தாந்தங்கள், நாடு வளர்க்கப்போராடிய, போராடும் தேசிய கட்சிகள்... இவை அனைத்தையும் இணைக்கும் மையப்புள்ளியாக இந்த 'பகல்நேர பாதுகாப்பு மையங்கள்' அமையட்டுமே.

ஜெய்ஹிந்த்!

மானுடம் வெல்லும் என்ற அசைக்கமுடியாத நம்பிக்கை தரும் பேரன்புடன்,

பாபுஜி.

(பின்குறிப்பு: படம் இணையத்திலிருந்து. இதன் காப்புரிமை யாரிடமாவது இருக்கக்கூடும். இங்கு வணிகமற்ற நோக்கத்திற்காக பயன்படுத்தியுள்ளேன். நன்றி)