நம் ஆன்மாவின் நிறம் கருப்பு

சில ஆயிரம் முதலைகளை அழிக்க, ஒரு பெருங்கடல் முழுவதும் குண்டு வீசலாம். அல்லது முதலைகளை வேறு சொற்பமான வழிகளிலும் பிடிக்கலாம்.

ப்ரச்னை என்னன்னா, முதலைங்களெல்லாம் பினாமி முதலைகளை காவு கொடுத்துவிட்டு மீண்டும் தம் பணியில் கண்ணும் கருத்துமாய். 

விருப்பு வெறுப்புகளை ஒதுக்கி வைத்து பாருங்கள். நம் அன்றாட வாழ்வில் ஊழலின் தாக்கம் குறையவே இல்லை. இன்றும் நாம் அரசு எந்திரத்தின் கடைசி ஆணிக்கு கூட கரன்சி காட்டாமல் எந்த ஆணியையும் நாம் பிடுங்க முடியாது...வேலையும் நடக்காது. 

'சர்வீஸ் சார்ஜ் எவ்ளோ?' ன்னு எந்த அலுவலகத்தில் கேட்டாலும் 'உங்களுக்கு பிரியப்பட்டத குடுங்க' என்பதாகவே பதில்!

அவங்க சரியாதான் சொன்னாங்க. நம்மடமிருந்து 'பிரிய'ப்படவேண்டியதாய் அவர்கள் நினைக்கும் தொகையை கேட்கிறார்கள். 

பண மதிப்பு இழப்பில் அவங்கள்லாம் ரொம்ப பாதிக்கப்பட்டிருக்காங்களா, அதனால, கூடுதல் வேகத்துடன் 'உழைக்கிறார்கள்'.

சொந்த ஊருக்கு ட்ரான்ஸ்பரா, கொடு 5 லட்சம் என்று கொடுத்தால், விட்டதை பிடிக்க வசூலிக்கையில் அங்காளி என்ன பங்காளி என்ன?!

வசூலித்தது, பணமாய், தங்கமாய், வைரமாய், நிலமாய்... எல்லாம் கறுப்பாய்தானே மாறுது!

"லஞ்ச ஒழிப்புத்துறை கண்காணிக்கிறது" என்ற banner இருக்கும் இடமெல்லாம் லஞ்சம் இல்லாமல் இல்லை! லஞ்ச ஒழிப்புத்துறை தலைவர்களே பிடிபடுவதும் அப்பப்ப லைட்டா நடக்குற ரத்த பூமிங்க இது (சி.பி.ஐ யே சாட்சி சொல்லும்:-) ஒழிச்சிட்டா ரணகளமாயிடுமுல்ல!!!!

இந்தியனும் பாட்சாவும் கூட்டு சேந்து தொரத்தினாலும், ஒரு விரல் புரட்சி நடத்தினாலும் 'சிஸ்டம்' காப்பாத்தும்!!!

ஏனெனில் இந்த சிஸ்டம் வேலை செய்யும் விதம் அப்படி!

'கை' காட்டி மிரட்டினாலும் 'சூலாயுத'த்தால் குத்தினாலும் இதற்கு வலிக்காது; நம் கைகள் கொண்டு நம் வயிற்றை நாம் எப்படி சுத்தம் செய்வது இயலாதோ அப்படி; கையால் எடுத்து உண்டதுதானே வயிற்றில்!

பொன்னகரம் என்றொரு புதுமைப்பித்தன் கதை. 'கற்பு கற்பு என்று பேசுகிறீர்களே, இதுதானையா பொன்னகரத்தின் கதை!' என்று முடித்திருப்பார்.

அவர் இன்று இருந்து, இந்தப்பதிவை எழுதியிருந்தால் இப்படித்தான் முடித்திருப்பார்: 

"

பணமதிப்பு இழப்பு பணமதிப்பு இழப்பு என்று கூவுகிறீர்களே, இதுதானையா ஆன்மாவை கரன்சிக்கு அடகு வைத்த நாட்டின் கதை!

"

பின் குறிப்பு:

'கடலில் ஏது முதலை?' என்கிறீர்களா?

That is the whole point!!!!!!