அது பிசாசுன்னா இது பேய்!
சிங்கார வேலனே தேவா - யம்மா! எந்த சின்ன வயது பெண்ணாலும் அவர்மாதிரி இன்று பாட முடியுமா?
காருகுறிச்சி அருணாசலம், நாதஸ்வர மேதை. இந்தப்பெண் அவரது நாதஸ்வரத்தோடு போட்டி போட்டு பாடிய பாடல், இவரது திரை அடையாளம், புகழ்வெளிச்சம்.
சின்ன வயதில் இந்தப்பாடல் ரேடியோவில் முதல் முறை கேட்டபோது அவர் ஆலாபனைகளை, கமகங்களை தாளிக்கையில் உள்ளுக்குள் என்னென்னமோ செய்தது.
நீண்ட நெடிய இசைப்பயணத்தில் தமிழ் மனதில் சிம்மாசனமிட்டு அமர்ந்த பெண் வசியக்காரி இவர். இன்றளவும்!
செந்தூரப்பூவை செந்தூரப்பூவே சில்லென்ற காற்றே என்று
காற்றே எந்தன் கீதம் காணாத ஒன்றை என்று,
நாதம் என் ஜீவனே என்று (விழியாகி விடவா!!!! அடடா!!!)
சுந்தரி கண்ணால் ஒரு சேதி என்று
கண்மணி அன்போட காதலன் என்று
இஞ்சி இடுப்பழகா என்று
மாருகோ மாருகோ மாருகயி என்று...
நான் வெவ்வேறு பருவங்களுள் நுழையும்போதெல்லாம் இவரும் புதிது புதிதாய்!
யாழ்முறிப்பாடல்கள் எனும் முக்கல் முணகல் பாடல்களையும் இவர் விட்டுவைக்கவில்லை!
எத்தனை நூறு பாடல்கள் பாடியிருந்தாலும் என் பர்சனல் favourite, பொன்வானம் பன்னீர் தூவுது இன்னேரம்!
பாடலின் துவக்கத்திலேயே உச்ச கதியில் இவரது குரல், பன்னீரை அல்ல, அலைகளின் சாரலை அதன் தனித்துவமான பேரிரைச்சலோடு நம் மனதில் தெளிக்கிறார். திரும்பத்திரும்ப!
காதலில் நெக்குருகி கலக்கத்தவிக்கும் இரு உயிர்கள். பெண்ணின் தாபம், காதலாய் குழைந்து இவர் குரலில், உயிர் உருகி கசிந்து... ஒரு சொல்லை இவர் பாடுவதில் எத்தனை ஏற்ற இறக்கங்கள்!
Magical இளையராஜா இசைத்தளம் அமைத்திக்கொடுக்க, அடித்து நொறுக்கியிருக்கிறார் மென்மையாய் பன்னீர் பூக்களால்!
எத்தனையோ முறை இந்தப்பாடலை நீங்கள் கேட்டிருக்கலாம், சிவகுமார்-லக்ஷ்மி இந்தப்பாடலுக்கு நடித்திருப்பதை பார்த்திருக்கலாம். ஒரு முறை, மொட்டை மாடியில், நிலவற்ற இரவில், தனிமையில் / மனதுக்கு பிடித்த துணையோடு, இந்தப்பாடலை மீண்டும் ஒரு முறை கேட்டுப்பாருங்கள். நடிகர் திலகத்தின் நடிப்புக்கு இணையாக இந்தப்பேயின் குரல் நடித்திருக்கிறதையா இந்தப்பாட்டில்!!!
"
பொன்வானம் பன்னீர் தூவுது இந்நேரம்
அட எண்ணம் மீறுது வண்ணம் மாறுது கண்ணோரம்..
பொன்வானம் பன்னீர் தூவுது இந்நேரம்..
மழைப்பூக்களே ஒதுங்க இடம் பார்க்குதே
மலர் அம்புகள் உயிர் வரைக்கும் தாக்குதே
மழை செய்யும் கோளாறு... கொதிக்குதே பாலாறு...
இது காதல் ஆசைக்கும் காமன் பூசைக்கும் நேரமா?
இந்த ஜோடிவண்டுகள் கூடு தாண்டிடுமா?
பொன்வானம் பன்னீர் தூவுது இந்நேரம்
இந்த தாமரை மலர்ந்தபின்பு மூடுமோ?
பட்டு பூங்கொடி படர இடம் தேடுமோ?
மலர்க்கணை பாயாதோ... மதுக்குடம் சாயாதோ?
இந்த வெள்ளை மல்லிகை தேவ கன்னிகை தானம்மா...
மழை காமன் காட்டில் பெய்யும் காலமம்மா...
பொன்வானம் பன்னீர் தூவுது இந்நேரம்
அட எண்ணம் மீறுது வண்ணம் மாறுது கண்ணோரம்...
பொன்வானம் பன்னீர் தூவுது இந்நேரம்...
"
(வைரமுத்துவின் கவிதை வரிகள், ராஜாவின் இசையில், ஜானகியின் குழைவில், தமிழுக்கு அமுதென்று பேர்!)
இந்த இசையரசியின் 80 ஆவது பிறந்தநாள் எந்த விதத்தில் ஆஷா போன்ஸ்லேயின் பிறந்தநாளைவிட குறைந்தது? ஏன் கொண்டாடத்தெரியவில்லை நமக்கு?
உங்கள் கருத்தோடு, உங்களுடைய favourite ஜானகி பாடலை பதிவிடுங்களேன்!
கருத்துகள்
கருத்துரையிடுக