என் விழித்திரையில் : விஸ்வரூபம் பாகம் 3.
இறந்துபோன ஓமரோட ரெண்டாவது பையன் ஜமால் படிச்சி டாக்டராகி பாகிஸ்தானுக்கே சேவை செய்ய வருகிறான்.
மூத்தவன் என்ஜினியராகி அமெரிக்க விமானப்படைக்கு அதி நவீன தொழில்நுட்பங்கள் செய்து தரும் பணியில் இருக்கிறான்.
இவங்க ரெண்டு பேரையும் யாருக்கும் தெரியாம இயக்குகிற Handler, நம்ம கஷ்மீரி (கமல்). அவரு இப்ப RAW (Research Analysis Wing) ல எல்லாரும் மரியாதையோடும் வியப்போடும் பார்க்கிற செயல் தலைவர்.
இவர்களது இலக்கு பாகிஸ்தான் அபோட்டாபாத்தில் தங்கியிருக்கும் ஷேக்கு (ஒசாமா பின் லாடன்).
டாக்டர் ஓமரின் மகன் என்ற அடையாளத்தால் அல் கொய்தாவில் சுலபமாக முன்னேறி ஷேக்கின் தனி மருத்துவராகிறார்.
இவர் மூலம் கஷ்மீரி காய் நகர்த்தி ஒசாமாவை 'தீர்க்க' நாள் குறிக்கிறார்.
இன்ஜினியர் அண்ணன், பாகிஸ்தான் ரேடாரில் சிக்காத தொழில்நுட்பம் கண்டுபிடித்து அதை பயன்படுத்தி அமெரிக்க விமானப்படை கமாண்டோக்கள் பாகிஸ்தானின் வான் எல்லைக்குள் ரகசியமாய் நுழைய, ஷேக்கு சிக்கினாரா இல்லையா? கஷ்மீரியின் எதிர்காலம் என்ன ஆனது?
(கிளைக்கதை:
கஷ்மீரியின் புகழ் ஏற்கனவே ஆசியா முழுதும், ஐரோப்பா முழுதும், உலகம் முழுதும், பரவி, தமிழகத்தில் மட்டும் வேறெந்த நிலப்பரப்பிலும் இல்லாத அளவுக்கு ரசிகர் அமைப்புகள் முளைத்து, நற்பணி மன்றங்களாய் மாறி. அரசியல் அமைப்பாக உருவேறி, 'தமிழகத்தின் அடுத்த முதல்வர் டாக்டர் காஷ்மீரி' என ஜீர வேகத்தில் இயக்கத்தினர் இருக்கையிலேதான் 'ஆபரேசன் அபோட்டாபாத்'! தமிழகத்தின் தலையெழுத்தையே தீர்மானிக்கப்போகும் ஆபரேசன் இது என்பது ஒசாமாவுக்கு கூட தெரியாத டாப் சீக்ரெட்!!)
ஒசாமாவின் இறுதி நிமிடங்களை கஷ்மீரியின் நண்பரொருவரின் ஐடியாலஜிபடி 'எதிரியின் மரணத்தை நேருக்கு நேர் பார்க்க' கஷ்மீரியும் கமாண்டோக்களுள் ஒருவராய்.
வழக்கம்போல அவரது தலையில் கமாண்டோ வடிவில் ஊடுருவிய தமிழக ஆளுங்கட்சி தலைவர் உருட்டுக்கட்டையால் தாக்க, கஷ்மீரி மயங்கி சாயும் அந்த நொடிகளில் ஃப்ளாஷ்பேக் 'விஸ்வரூபம் 2' ஆக விரிகிறது!
அதில் கஷ்மீரி எப்படி இங்கிலாந்தை தீவிரவாதிகள் உண்டுபண்ண முயலும் சுனாமியிலிருந்து காத்து பின் இந்தியாவை ஓமரின் 64 குண்டுகளில் இருந்தும் காத்து, மனைவியைக்காத்து, ஓமரையும் அவனது அடியாட்களையும் வகை வகையான சண்டை முறைகளை கையாண்டு கொன்று, இறந்து போன தோழிக்காக வருந்தி, ஒமரின் மரண வாக்குமூலம் மூலம் விஸ்வரூபம் 2 ஐ எப்படி Justify செய்கிறார் என அழகான பெண்களுடன், இந்திய அளவில் புதிதான (இந்திய திரையுலகை டெக்னிகல் சமாசாரங்களில் அடுத்த தலைமுறைக்கு நகர்த்தும்) மிரட்டும் தொழில்நுட்பத்துடன், பேசிப்பேசியே சாதித்திருக்கிறார்.
காட்சிகளில் புரியவைக்கவேண்டிய கதை முடிச்சுக்களை, ஒரு கதை சொல்லியாக 'தொடர் வர்ணனை' போல சொல்லிக்கொண்டே பணியாற்றும் ஒரு தீவிர பயங்கரவாத ராணுவ உளவாளியை உலகம் இதுவரை கண்டதில்லை!
படம் பார்த்து இருக்கையை விட்டு எழும்போது நான் கவனித்த உரையாடல், பதின்பருவ பையனுக்கும் அவனது தகப்பனுக்குமிடையில்:
'படம் புடிச்சிதாடா?'
"அப்பா, சுத்தமா புரியலப்பா. ஆனா பயமா இருந்ததுப்பா"
'எனக்குந்தான் புரியலடா. ஆனா பழகிட்டதால பயம் போய்டுச்சி!'
கருத்துகள்
கருத்துரையிடுக