இந்தக்கிழவன் சாதாரண ஆளில்லை!
சுதந்திர நாடு என்றால் என்னங்க?
விடுதலை அடைந்த நாள் சுதந்திர நாள் என்றால், விடுதலை அடைந்தவரெல்லாம் சுதந்திரமாக வாழும் நாடாச்சா அந்த நாள் முதல்?
இல்லையே!
தனி மனித சுதந்திரம் - அரசியலமைப்பினால் பாதுகாக்கப்பட்ட நீதித்துறை இதன் எல்லைகளை வகுக்கிறது. என் விரலை உன் மூக்கின் நுனி வரை நீட்ட எனக்கு சுதந்திரம் இருக்கிறது, தொடுவதற்கு உன் அனுமதி வேண்டியிருக்கிறது.
அனுமதிப்பதும் அனுமதிக்காததும் உன் சுதந்திரம்; தனி மனித சுதந்திரம்.
நாட்டின் சுதந்திரம்? சுதந்திர நாடு?
இதைப்பற்றி நமக்கு பலவித கருத்துகள் உண்டு; புவியியல், மொழி, இன, மத, அரசியல் சார்ந்த கருத்துக்கள், அவற்றில் தோய்ந்த கருத்துக்கள்.
சுதந்திரம் வாங்க சரியான நேரத்தில் சரியான இடத்தில் வினையூக்கியாக உப்பிட்ட ஒரு கிழவன், சுதந்திரத்தை இப்படி வரையறுக்கிறான்:
'என்று ஒரு பெண் நள்ளிரவில் அணிகலன்களுடன் பயமின்றி நம் சாலைகளில் தனியே நடமாடமுடிகிறதோ அன்றே நாம் சுதந்திரம் ஆனோம்'!
இவன் சாதாரண ஆளில்லை, இவனது வரையறையும் நுனிப்புல் வகையில்லை;
ஏன் பெண்?
ஏன் நள்ளிரவு?
ஏன் நகைகளுடன்?
ஏன் தனியே?
ஏன் இந்த கேள்விகளை யாருமே (சட்டங்கள் தீட்டுவோரும் அதன்படி நடக்கவேண்டியவரும்) தெளிவுபட அலசி தீர்வுகளடங்கிய சட்டங்கள் இயற்ற இயலவில்லை? அமல்படுத்த இயலவில்லை? அதன்படி நடக்க இயலவில்லை?
இந்த கேள்விகளை ஆழ்ந்து சிந்திப்பவர்க்கு நீண்டதொரு சிக்கலின் நுனி பிடிபடலாம்...
ஆதி மனிதன், மரத்திலிருந்து தரையிறங்கி, குகை மனிதனாகி, பால்பேதமின்றி உணவு வேட்டை செய்து, நடைமுறை சிக்கல்களின் தீர்வாக (மாதவிலக்கின்போது விலங்குகள் குருதி மணம் கண்டு, ஆண்களைவிட வலிமை குறைந்த இவர்களை எளிதில் வேட்டையாடி...) ஆண்கள் வேட்டைக்கு, பெண்கள் வீட்டுக்கு என காலப்போக்கி்ல் வரையறை செய்தபின் இன்றுவரை இந்த 'சட்டம்'தான் செல்லுபடியாகிறது உலகம் முழுதும்.
பண்டமாற்றின் பண்டைய கரன்சியாய் புழக்கத்துக்கு வந்த தங்கம்,
வீட்டிலிருக்கும் பெண்களுக்கு சூடி அழகுபார்க்க, இக்கட்டான நேரங்களில் பண்டம் மாற்ற என இவர்களின் உடலில் ஏறிக்கொண்டதும் காலப்போக்கில் நடந்ததே.
பெட்டியில் பூட்டிய தங்கத்தை கள்வர் உடைத்தால் பெட்டி அலறாது, பெண்கள் அலறுவர், கள்வர் பிடிபடுவர். எனவே பெட்டியை விட பெண்ணே தங்கத்துக்கு காப்பு. பெண்கள் எப்போதும் வீட்டில்தானே என்பது கூடுதல் பாதுகாப்பு.
மனிதர்களின் எல்லைகள் விரிய விரிய விலங்குகளின் எல்லைகள் குறைந்தாலும், மனித மிருகங்களின் எண்ணிக்கையும் எல்லைகளும் விரிந்துகொண்டே செல்கின்றன. இவர்களின் தேவைகளும்தான்.
பேராசை பெருநுகர்வுத்தேவைகளே பெண்களை மீண்டும் பொதுவெளியில் தள்ளுகிறது, காது கழுத்து தங்கத்தை அறுத்துப்போக வைக்கிறது. வலிவற்ற சட்டங்கள், இப்பெண்களின் கற்பு அறுபட்டாலும் கடுமையாய் தண்டிக்காது என நடைமுறையில் உணர்ந்த, 'வளர்ச்சி' போதையிலும் (சாராயம் முதல் உள்ளங்கை உலக டெக்னாலஜி வரை போதைதானே), சகலத்தையும் சதையை முன்னிறுத்தி விற்கும் பேராசை பெருவணிகம் தரும் 'ஜிவ்' உணர்விலும் (addictive high) உந்தப்படும் மனித மிருகங்கள் பாதுகாப்பற்ற பெண்களின் கற்பை தொடர்ந்து வேட்டையாடவைக்கிறது. நம்மை விட்டு அகலாத குகை மனித மனப்பாங்கு ஏனையோரை வேடிக்கை மட்டுமே பார்க்க வைக்கிறது.
இந்த நீள் சிக்கலின் நுனி கண்ட கிழவன், அதை அவிழ்ப்பதற்கு காட்டிய வழி எளிது:
பெண்களின் மீதும் தங்கத்தின் மீதும் கொண்ட மோகத்தை கொன்றுவிடு.
இல்லையென்றால் சட்டம் கொன்றுவிடும் என 'கொன்று' உணர்த்து. இவையிரண்டையும் நடைமுறைப்படுத்தமுடிந்தால்மட்டுமே உன் நாடு சுதந்திர நாடு!
உன் விரலின் சுதந்திரம் என் மூக்கின் நுனிவரை மட்டுமே, தொடாமல் மட்டுமே என 70 வருடங்களாய் ஜல்லியடிக்கிறோம். மூக்கு வேறு, குறி வேறு என்று வீண் வாதம் பேசாமல் கிழவனது கனவு நனவாக சிந்திப்போம், செயல்படுவோம். அதுவரையில், 'என் உடை என் விருப்பம், எங்கு எந்நேரத்தில் என்ன செய்யக்கூடாதென்று என்னை யாரும் கட்டுப்படுத்த முடியாது' என முன்சொன்ன டெக்னாலஜி மோகத்தால் உந்தப்பட்டு வீண்வாதம் செய்து உள்ளாடை தெரிய சுற்றும் நம் தங்கைகளுக்கு மென்மையாய் புரியவைப்போம் 'தெருவில் வெறிநாய்கள் இருப்பது தெரியவந்தால் கவனமாய் கடப்பது பொது அறிவு' என.
சுதந்திரம் விரைவில் கிட்ட வாழ்த்துக்கள்!
பின் குறிப்பு:
கிழவன் சொன்னது 'இயல்பாய் ரசிக்கும் வண்ணம், பார்ப்பவர் மனதில் மரியாதையை உண்டாக்கும் வண்ணம்' உடையணிந்து நடக்கும் பெண்களுக்கு மட்டுமே!
பொதுவெளியில் இன்றைய இந்தியாவிலும் பெண்கள் அளவு 'உடலை வெளிப்படுத்தி' உடையணியும் ஆண்கள்? நான் கண்டதில்லை.
கருத்துகள்
கருத்துரையிடுக