டோர்லி, விற்பனைக்கு!
வார்தா புயல் அனேகருக்கு தெரிந்திருக்கும். வார்தா என்றொரு பகுதி இந்தியாவில் இருக்கிறது தெரியுமா? பசுமைப்புரட்சியின் தொடர்விளைவுகளால் விவசாயிகள் தற்கொலைகள் அதிகம் நிகழ்ந்த பகுதி என சிலருக்கு தெரிந்திருக்கலாம்.
ஆனால் டோர்லி என்ற கிராமத்தை உங்களுக்கு தெரிந்திருக்க வாய்ப்பில்லை.
அங்கு வாழ்ந்த 270 குடும்பங்களுக்கு சொந்தமான 800 ஏக்கர் விளைநிலம். கால்நடைகள், வண்டி வாகனங்கள், மரங்கள். மற்றும் தலைக்கு முப்பதாயிரம் கடன் என சுமார் அறுபது லட்சம் கடன். ஆண்டு 2006.
மழை பொய்த்து, கடன் பட்டு, அரசுகள் கைவிட்டு மேலும் கடன்பட்டு நொந்த மக்கள் கூடி முடிவெடுத்தது; 'வித்துரலாம்'!.
ஊரிலுள்ள கால்நடைகள், மரங்கள் மற்றும் வண்டிகள் அனைத்திலும் 'For Sale' என்று பெயிண்ட்டில் எழுதி, 'அனைத்து நிலங்களும் வீடுகளும் விற்பனைக்கு' என விளம்பரங்கள் வைத்தும் யாரும் (ஊடகங்களும்தான்) கண்டுகொள்ளவில்லை. ஜகமும் அழியவில்லை...
டோர்லி என்ன விராத், அனுஷ்கா போல நமது அடுத்த வேளை சோற்றை முடிவுசெய்யும் அளவுக்கு பெயர்பெற்ற கிராமமா என்ன?!
அரசு உதவி கிட்டவேயில்லை; ஆனால் பசித்த வயிறின் குரல் மானுடத்திற்கு எப்போதும் கேட்குமாம். கேட்டது, ஆந்திராவில் தற்சார்பு விவசாயம் பயின்ற ஒரு குழுவுக்கு.
அவர்களின் உதவிக்கரம் பற்றி டோர்லி வேதியியல் விவசாய, கடன் பிடிகளில் இருந்து தற்சார்பு விவசாயம் (self sustainable farming) மூலம் மீண்டு, கடன் முழுதும் பத்தே ஆண்டுகளில் அடைத்து நிமிர்ந்த கதையும் நமக்குத்தெரியாது...தோனிக்கு என்னாச்சின்னு கவலைப்படவே நேரமில்லையே ப்ரோ!
படிக்க மாணவர்கள் இன்றி பொறியியல் கல்லூரிகள் விற்பனைக்கு வந்தால் நல்லது. வாங்க ஆளில்லாமல் பல மூடப்பட்டாலும் நல்லது; கல்வித்தரமாவது மேம்படும். ஆனால் கிராமங்கள் விற்பனைக்கு வந்தால் என்ன ஆகும் தெரியுமா?
மலிவான விலைக்கு பெரு வணிகம் இவற்றை வாங்கலாம். சிறு சிறு கிராமங்களை இணைத்து விளை நிலங்களையும் வசிப்பிடங்களையும் தனித்தனியே பிரித்து எல்லைக்கோடுகள் வகுத்து, பெரு விளைநிலங்களாக மாற்றலாம். பெருவிசை எந்திரங்கள் மற்றும் ஆலைகள் என வயல்வெளியின் தன்மை மாறலாம். கிராம நில முன்னாள் உடைமையாளர்கள் அதே நிலங்களில் பயிர் வளர்க்கும் தொழிலாளிகளாக ஆகலாம்...இதை எதிர்பார்த்தே அரசுகள் கிராமங்களை காப்பதில் ஆர்வமின்றி இருக்கலாம்...
என்னது, இதெல்லாம் ஏற்கனவே நடந்தாச்சா?! சிங்குர்னா சொன்னீங்க?!!!
நோ நோ! நான் சுட்டும் நிகழ்வில் உற்பத்திசெய்யப்படப்போவது என்னவோ உணவுப்பொருட்கள் மட்டுமே!
பின்குறிப்பு: ஒரு டன் விறகின் இன்றைய விலை 4000 ரூபாய். ஒரு டன் கரும்பின் ஆலை கொள்முதல் விலை 2400 ரூபாய் மட்டுமே!
கருத்துகள்
கருத்துரையிடுக