நழுவும் மொழி - முன்னுரை

கம்ப்யூட்டர் பற்றி புத்தகங்கள் மூலமே அறிந்த ஒரு தலைமுறை இன்று புத்தக வாசிப்பை மறந்துகொண்டிருக்கிறது வெகுவேகமாய், கம்ப்யூட்டரில் படிப்பது சாத்தியமென்றாலும்.

'யு நோ? என்க்கு எது படிச்சாலும் ரெண்டு பேஜுக்குள்ள இருக்கணும். இல்லேன்னா இன்ட்டரஸ்ட் போய்டும். ப்ளஸ், who has time for reading books?!' என தோள்குலுக்கி நகர்ந்தாலும், புத்தகங்கள் வாங்குவது மட்டும் குறையவில்லை. யார் படிக்க?

மொழி என்பது முதலில் தாய்மொழி. அது தொப்புள்கொடி உறவு. மூளை வளரும் முதல் மாதங்களில் எந்தக்குழந்தையும் அதிகம் கேட்பது தாயின்மொழி. அது 'தாய்மொழி'யாக இருந்தவரையில் குறையொன்றுமில்லை. தாய்க்கே தாயின் மொழி கற்கும் விருப்பம் குறைந்து (I hate Tamil, what with such difficult grammer...கூறுகெட்ட எதிர்மறை nonsense!. You know, French is the most romantic language in the world...and...easiest to learn!') வேற்று மொழிகளை சீராடும்போதுதான் தொப்புள் கொடி பாழடைகிறது.

எனது அனுபவத்தில் நான் உணர்ந்தது இதுவே 'அடிப்படை தாய்மொழியிலென்றால் பன்மொழியும் சுலபமாய் பின்பயிலலாம்'. A true polyglot is one who builds other-language -skills ON his/her mother tongue'.

வாசிப்பே குறைந்துவரும் இக்காலத்தில் தாய்மொழியை ஒரு தடையாக (நழுவுமொழி - language of excuse) சுட்டாமல், அதன்மீது ஆர்வத்தைத்தூண்ட, குறிப்பாக தமிழ் படிக்க மறக்கும், மறுக்கும் மக்களுக்காகவும் எதிர்காலத்தில் என் குழந்தைகளுக்கான வாசிப்பு உலகின் அடித்தளமாகவும், நான் வாசிக்கத்தொடங்கி என்னை வாசித்துமுடித்த Classic புத்தகங்களை ஒரு தொடராக அறிமுகப்படுத்தும் என் சிறு முயற்சி இது. 

நம் எதிர்காலத்திற்காக நீர்நிலைகளை காப்பது கடினமென்றாலும் முயல்கிறோம். நீர்நிலை போன்றே அவசியமான வாசிப்பை காப்பது சுலபம். படிக்கவேண்டும். அவ்வளவே! 

வாசிப்போம், வாருங்கள்.