இன்றைய ஸ்பெஷல்: கரடி பர்கர்!
'அம்மா, காடு பாக்கணும்மா. அப்பா காடு பாக்கணும்ப்பா'.
"ஏம்மா, எதுக்கு உனக்கு காடு பாக்கணும்?!"
'அங்க சிங்கம், புலி, கரடி எல்லாம் இருக்காம்ப்பா. எனக்கு பாக்க ஆசையா இருக்கு'.
"ஓ அதனாலயா! ஜோரா போலாம். ஆனா அது பயங்கரமான இடம். அசந்தா மிருகங்கள் நம்மை சாப்பிட்டுடும்!!! பாதுகாப்பான இடம் ஒன்னு நம்ம நகரத்திலயே இருக்கு. அதுக்கு zoo ன்னு பேரு. அங்கே போலாமா?"
"!! Zoo ம் காடாப்பா? அங்க மிருகங்கள் இருக்காப்பா! எப்படி அதெல்லாம் வந்தது?'
"இருக்கு... ஆனா தானா வராதும்மா. கொஞ்சம் பேர் காட்டுக்குள்ள போய் புடிச்சிட்டு வந்து இங்க காடு மாதிரி செட் பண்ணி உள்ளே விட்டுடுவாங்க".
'அந்த மிருகங்களுக்கெல்லாம் சாப்பாடுப்பா?'
"அது... வேளா வேளைக்கு குடுத்திடுவாங்கம்மா"
'அதுங்கல்லாம் zoo விலருந்து தப்பிச்சிட்டா?'
"அப்படியெல்லாம் ஆகாதும்மா. மனுஷங்க நாம ரொம்ப பவர்ஃபுல். தப்பிக்க விடமாட்டோம்... எப்போ போகலாம்னு சொல்லும்மா"
வீட்டு வாசலில் வந்து விழுந்த செய்தித்தாளை அப்பா எடுத்து வருகிறார். அதில் கடைசி பக்கத்தில் ஒரு சிறிய பெட்டிச்செய்தி:
'
03.06.2018
பெர்லின் நகரில் கன மழை, கடும் வெள்ளம். ஊர் மத்தியில் உள்ள zoo வில் ஒரு சிங்கம், ஒரு புலி ஒரு கருஞ்சிறுத்தை, ஒரு கரடி காணவில்லை எனவும், அவை தப்பியிருக்கலாம் என்ற பயத்தில் ஊர் மக்களை வீட்டை உள்ளிருந்தே பூட்டிக்கொண்டு பத்திரமாக, எச்சரிக்கையாக இருக்குமாறும் அறிவுறுத்தப்பட்டனர். பின்னர் வெள்ள நீர் வடிந்ததும் zoo வுக்குள்ளேயே சகதியில் சிக்கியிருந்த புலி, சிங்கம், கருஞ்சிறுத்தை மீட்கப்பட்டன. தப்பிச்சென்ற கரடி மட்டும் சில மணி நேரத்தேடலுக்குப்பின் zoo விற்கு வெளியே கண்டுபிடிக்கப்பட்டு சுட்டுக்கொல்லப்பட்டது. இதுபோல சில ஆண்டுகள் முன்னர் வெள்ளத்தில் தப்பிச்சென்ற சிங்கம் ஒன்றும் சுட்டுக்கொல்லப்பட்டது நாம் அறிந்ததே.
'
இது இன்றைய செய்தி, உண்மையில் பெர்லின் நகரில் நேற்று நடந்தது!
சுதந்திரமான காட்டு விலங்குகளை விலங்கிட்டு கூண்டிலடைத்து 'பாதுகாப்பாய்' நகருள் நாம் பார்ப்பதற்காக உலவ விட்டு, தப்பிச்செல்தல் என்றால் என்ன என்று கூட சிந்திக்க இயலாத இவ்வுயிர்கள் இயற்கைப்பேரிடரில் 'தப்பித்தவறி' வெளியேறினால் 'நமனை அஞ்சோம்' என அதுவரை இறுமாந்திருந்த நாம் அஸ்தியில் ஜன்னி கண்டு உடனே படை சேர்த்து நகருள் வேட்டையாடி கொன்று குவித்து, 'அப்பாடா, ஆபத்து நீங்கியது' என மகிழ்வது... என்ன பிறவி இது?
இன்று மாலை பெர்லின் நகரில் ஆபத்து நீங்கிய நிம்மதியில் ஏதாவதொரு உணவகத்தில் சிலர் கரடி பர்கர் சுவைத்தவண்ணம் இதைப்பற்றி பேசிக்கொண்டிருக்கலாம்...
'கண்ணீர் அஞ்சலி' போஸ்டர்களை அறியாத கரடி சுற்றமும் நட்பும், இறந்தவர் எங்கோ தொலைவில் மலைக்காட்டில் தேன் வேட்டையாடிக்கொண்டிருப்பதாய் கரடிக்குழந்தைகளுக்கு காட்டு மரக்கிளையில் நிலவொளியில் கதை சொல்லி தூங்கச்செய்துகொண்டிருக்கலாம்...
அந்த கரடிக்குழந்தைகளின் தலை வருடிக்கொடுக்க என்னோடு யார் வந்தாலும் மகிழ்வேன்...
கருத்துகள்
கருத்துரையிடுக